Pukirobas do mapxas(monç̆inoras) mʒkvitura bağis var amulunan. Mara qinobas eşo var ren. Qinobas mşkiyoneri renan. Mtviri mteli komotumers do oç̆k̆omale var iz̆iren. Gorupan ga'ri quci ginz̆epek. Gores, gores do ar bağis komoxtes. Bağis ağani uşkirişi ncalepe(ncape) t̆es. Mʒkviturapek entepes naxoles do t̆k̆ebepe oxvat̆us kogoç̆k̆es. Bazi ncalepeşi mteli t̆k̆ebi kogoxvat̆es.
Pukiroba(purkinora) moxtaşi, cirek̆i do pesopek oçalişus(oxandus) goç̆k̆asen. Let̆aş ʒ̆k̆ari oʒ̆inʒ̆us kogoç̆k̆apan do jin but̆k̆apes yulunan.
But̆k̆apekti ga'rişi ogorus kogoç̆k̆asenan do ncaş t̆k̆ebişi doloxe ambari ncğonopan tude cirek̆i do pesopes. Ga'ri, mʒkviturapek na goxvat̆es svaşa(yerişa) komulun do kododgitun. Gza mek̆vateri ren. Çkva sotis var nilen. Cirek̆i do pesopek, but̆k̆apeşen ga'ri ak̆vandapan. But̆k̆apek, cirek̆i do pesopeşen ga'ri ak̆vandapan. Mara ga'ri var yulun. Em oras nca doxomun.
Mʒkviturapeşen muç̆oşi nca çvare?
Oputurepek ʒ̆oxle çalate kogok̆ires ncalepe(ncape), mara mʒkviturapek çala xvat̆es do kogoşobğes do xvala t̆k̆ebis meç̆işes. Açkvati çalapeşi doloxe mtugepe t̆u. Aʒ̆i hem mʒkviturapek, hemti mtugepek ncapes t̆k̆ebepe oxvat̆us kogoç̆k̆es. Em oras oputurepek, ncape daz̆epete gok̆iru komoingones. Emute k̆ayi iqu. Mʒkviturapek daz̆epeşen aşkurinet̆es do ncapes var mek̆vanç̆unet̆es. Majurani oputesti k̆ayi ğoberi doqves. Ğoberişi xolos mʒkviturapek ʒxont̆apan, meʒxont̆apan, mara bağis var amalenan. Aşote mʒkviturapeşen kamuçites.