Stveli komoxtu. Bağis mçxu do ʒ̆k̆aroni(zominoni) uşkiri do mʒxulepe iz̆iren.
K̆arta ndğas ʒ̆ilupan meyvepe. Mara; ak ek̆o dido ren ki, oncğonus var naç̆işenan do tumbepes, dido uşkiri do mʒxuli let̆aş jin z̆inan. Limcis, badi Xasani bağişa nulun. Eya mçumale ren. K̆arta ndğas, mota muşi Xalidik emus aço oxveʒ̆a p̆t̆u:
- P̆ap̆uli, mu iqven, manti vida oçumuşa(oçumaluşa)!
- Nciri komogixtun, var gaçven, mota çkimi!
- Var p̆ap̆uli, nciri var momixtun, var vincir, pçvare!
Xalidik, ar faras dido axveʒ̆u. T̆aroniti k̆ayi t̆u. P̆ap̆uli muşi razi diqu do Xalidi oçuşa mendiqonu.
Nʒas milioni milioni muruʒxepe lukunasteri iç̆ven. Tutati extu. Te muşi baği konutanu. Eşo mskva iqu ki, otkute var içoden.
Xalidi, şuroni xomula tipis kocans do muruʒxepes oʒ̆k̆en. Mu eyma meyna(eşo aşo) muruʒxepeş Cumuhuriyetepe renan. Bazepe k̆vinçis mengapan, bazepe angis. Ehe tuta. Eti mçire, dimargvaleri nunk̆us mengaps. Xalidik, tutas oʒ̆k̆edu oʒ̆k̆edu eya didi limoni dvaʒ̆ onu(daʒ̆onu). Goʒ̆omalu guris kodolingonu, mara xe muşi var meç̆işun. Muk̆onariti menceli meçaptuna mutu var iqu, var naç̆işinu. Xalidik; ar ginz̆e ʒ̆alami koz̆iru, kezdu do emute, limoni na daʒ̆onu ondi onçxalus kogöç̆k̆u. Ʒ̆alami monk̆a na t̆uşeni eya k̆ayi var akaçu, xes gamustu do ti muşis mat̆u. Ʒ̆alami mat̆uşi, sersi ignu:
- Mu k̆ayi mçumele t̆eree(t̆erere)!
Xalidik, p̆ap̆uli muşişi sersi içinu. Toli muşi kogonʒ̆k̆. Goʒ̆k̆edu iri k̆ele. Mu tuta, mu muruʒxi, çkar mutu var ren. Ndğaleri iqveren.
P̆ap̆uli muşik z̆iʒineri:
- Mu k̆ayi çvi. Mtugis ar mʒxuliti var naxvat̆u!