Ma gzas mevit̆işi, uk̆açxendo oquru vogni. Beremç̆k̆eşik qurap̆t̆u. Eya zenis unk̆ap̆ut̆u do ar mutxani oʒ̆irap̆t̆u. Ek mendap̆ʒ̆k̆adişk̆ule, zenis jur mgerişen na imt̆ert̆u bz̆iri. Arteri morderit̆u, majurani ağanmordalet̆u. Ağanmordale mgerik, ar txaş tik̆ani k̆ap̆ulas mek̆ideri iqonapt̆u. K̆uçxemuşi k̆ibiris dokaçeri unk̆ap̆ut̆u, morderi mgerik entepeş k̆ap̆ula muşis unk̆ap̆ut̆u. Ek̆ule ağanmordale do morderi mgerik, bereş k̆ap̆ulaşen(uk̆açxendoşen) unk̆ap̆inu met̆k̆oçes do omt̆inus kogoç̆k̆es. Mgerepe bz̆iriş k̆ule, manti mç̆k̆eşik̆ala entepes gevotxozi. Çkin omğorus kogevoç̆k̆it. Çkini sersişa k̆oçepe coğorepek̆ala komoxtes. Morderi mgerik k̆oçepe do coğorepe z̆iruşk̆ule, ağanmordale mgeris meç̆işu, txaş tik̆ani koguʒ̆uğu do k̆ap̆ula muşis keit̆k̆oçu. Jur mgeri mani mani unk̆ap̆es do tolişen kogondunes.
Em oras beremç̆k̆eşik oxoʒ̆onapus kogoç̆k̆u. Dulya aşot̆u: Dolorubas didi mgeri gamat̆k̆vaʒu, txaş tik̆ani oç̆opu do mendiğu.
Ağanmordale mgeri, morderi mgeri konogagu do txaş tik̆ani yezdimuşeni dixaziru. Badi mgerik, omaluşeni ağanmordale mgeris txaş tik̆ani komeçu edo muk xolo gzas dikaçu.
Jurik ma bz̆ireşk̆ule, k̆ap̆ulaçkimişen memitxozes. Ek̆ule k̆oçepe do coğorepe koz̆ireşk̆ule, morderi mgerik ogurapu konaşku do tik̆ani muk yezdu.